Sidaamu Dagoomu Qoqqowi Amaale Mini Songaafitte

                                            Ayirrado Dukko Faantaye Kebbede        

  Sokka                                          

“Baalunku qoqqowinkenna Itophiyu daga hawalle Sidaamu Dagoomu Qoqqowi Mootimmatantano 2^ki diri safote ayyaana Ella 27/2014 M.D keerunni iillishi’ne!” yaanni umi’yanna hala’lado Sidaamu daga su’minni luphiima keere shiqisha baxeemma.

Sidaamu daga umose gashshate xa’mo dagate sharronni assinoonnita ikkitanna, Sidaamu ilama mundeete baatooshshe baatte, lubbonsa hoogge, bisu xe’nera ikkite, gobbatenni darantennaa kkimalu qarrira ubbanni 130 diri aleenni sharrantanni keeshshitino. Ikkeennano, tenne xa’mo albiidi Sidaamu Zoone Amaale Mini miilla Maaja 11/2010 M.D wo’ma huuronni kaajjishshino; xa’mono WDDMQM Amaale Minira shiqquhu gedensaanni jawa sharronni dimokiraasitte doogonni Bocaasa 10/2012 M.D gobbankeha bayi’riidi seeri amanyoote agadhino garinni dagate riferendeme assinoonni. Dagano doorshunni 97.7% huuronni umise qoqqowu gashshoote ikkate gumu’litino. Ella 11/2012 M.D WDDMQM Amaale Mini nobiiloonye faajjetenni sayseeenna IFDR Federeshiinete Amaale Mini IFDR miila qoqqowo ikke maareekkamanno gede asseenna 10^ki qoqqowo ikkino. Ella 27/2012 M.D Sidaamu  Dagoomu Qoqqowi Mootimma 190 Amaalete mini miillanni faajjetenni safaminkunni kuneeti lame diro ikkino.

Qoqqowu amaale mini lamu diri giddo daga horaameeyye assitannota qoqqowu mootimma massagantannota bayriidi seerano lede babbaxxino lallawa, wodhonna biddissa kaajjishino. Hattono, qoqqowo tonnu diri giddo dagoomittete, miinjittete, poletikunna latishshunni horaameeyye assitannota massagaancho mixo amaalenke mininni kaajjite loosu aana afantanno.

Bayriidi seeri garinni sasenta mootimmate bisubba uurrisatenni Sidaamu dagaayimma gotti assitannoti baca loossa loosantanni leeltanno. Sidaamu umisi baandeera, qoqqowoomu faarso budesinna afoosi woleno daganke horaameeyye assitannoti latishshu loossa loosantanni leeltanno. Yanna yannatenni amaalenke mini widoonni shiqqanno loosu rippoortenninna uurrinshu komite ha’runsonna keenonni buuxa dandiinoonni. Amaalenke mini tantanaminku harancho yanna ikkirono wolootu qoqqowubbara loosu rosicho beeha dandiino; lawishshaho, Dire Daawu Quchumu Gashshootinna Wodiidi Galchimi Itophiyu Daga Amaale Minira loosu rosicho beeha dandaasinni amaalenke minihu loosu kaajjilli mageeshshihoro afa dandiinanni.

Dimokiraasete gatamarshi loosi gummaamo ikkanno gede deerru deerrunku loosantanno latishshunna danchu gashshooti loossa dagate beeqqaanchimmanna horaamimma buuxisiissinotanna owaante aate widoonni leeltanno mitiimma ikkitannokki gede hajo la’annonsa bissara gumolo sayinsoommo. Qoqqowinke giddo keerunna ga’labbo hee’raseno teesate, hee’rate, gangalatatenna investimentete loosira dooramino qoqqowo ikkasinni, qoqqowinketi eote wolqa lexxitanni afantanno.

Jeefoteno, qoqqowu daga horo agarsiisate deerra deerraho heedhanno amaale mini miilla dhukansa kaajjishatenna yannitte beeqqo assatenni seera, wodhonna biddissa ayirrisatenni qeechu noonsa bissa wo’munku loosonsa kaajjillunni loossanno gede assatenni, wedellunna meentu dagoomitte, miinjitte, poletiku beeqqonsanna horaamimmansa kaajjitanno gede assate amaalete mini miilla qeechansa fultanno gede kaajjinshe loosatenni, qansootu baalunku keerunninna taalleenyunni latishshunna danchu gashshooti kasseenya afidhanno gede assate wo’munku qeechanke fulatenni woloota daga bebbeekkanno hajubba qacce qolle agurre mittimmanke kaajjinshe qoqqowinke jireenyi buuxamanno gede sharrama hasiissannonketa hadara yaanni kawaanni qole sokka’ya sayseemma.

Wirro Hawalle Tashshi Yii’ne! Hawalle Tashshi Yiinke! Kaaliiqi Gobbanke Maassi’ro!