Amaalete minna dagate roorre xawishsha, demokiraasete ijaara, dancha gashshoote halashshanna mootimmate loosi giddo dagate beeqqo buuxisiissanno qara uurrinshaati. Amaalete mini alba 1987 M.D zoonete hunda noo yannara umo uurrinohu bayiiridi seeri garinni ikkanna sase mootimate bissa biillonyinna loosisi xawo ikke diofollino.

1994 M.D woyyaawino bayriidi seerira 3 (sase) mootimate bissara biilloonyenna loosonsa bandenna xawinse seera fushshatenna aliidi politiku annimatee billoonye adhe tantanamanno gede assinoonni.

Sidaamu zone amaale mini Sidaamu umisi umosi gashshanno gede assinno sharro addinta lowota ikkitanna qara looso assire loosanni keeshinnori giddo dagate roorre xawishsha, demokiraasete ijaara, dancha gashshoote halashshanna mootimmate loosi giddo dagate beeqqo buuxisiissanno qara uurrinshaati.

1ki songaafichi: Ayirradu kalaa Taayye Billiso Ammajje 1985 kayise Birra 24/2003 M.D geeshsha, 2ki songaafichi: Ayirradu Kalaa Duguna Duukamo Ammajje 1985 kayse Sadaassa 1987 M.D geeshsha Sidaamu Zoone Amaale Mini giddo loossino.

Ayirradu Kalaa Taayye Billisonna kalaa Duguna Duukamohu   Misile

2ki yanna songaafichi: Ayirradu Kalaa Mulugeeta Halo Wocawaajje 01/1995 kayse Sadaassa 1997 M.D geeshshanna 2ki songaafitte: Ayirrado Baabba Amaarech Silla Wocawaajje 01/1995 kayse Arfaassa 1995 M.D geeshsha, Ayirrado Baabba Asnaaqech Adoola Badheessa 06/1997 kayisse Wocawaajje 1998M.D geeshshanna Ayirrado Baabba Adaanechi Tummicha Wocawaajje 04/1998 kayse Birra 24/2003M.D geeshsha Sidaamu Zoone Amaale Mini giddo loosinno.

Ayirradu Kalaa Mulugeeta Halo, Baabba Asnaaqech Adoolanna Baabba Adaanechi Tummichite  Misile

3ki songaafichi: Ayiradu Kalaa Selemoon Laalle Birra 25/2003M.D kayse Sidaamu Dagoomu Qoqqowi uurri barri geeshsha, 2ki songaafitte: Ayirrado Dukko Ayyelechi Ledamo Birra 25/2003 M.D kayisse layiinki songaafitte ikkite loossinno.

 Ayirradu Kalaa Selemoon Laallehanna Baabba Ayyelech Ledamota Sidaamu  Zoone Amaale Mini Songaafoota Assine Mootonsineenna Woyyo E`anino Misile

Ayirradu Kalaa Selemoon Laallehu Birra 25/2003M.D Kayise Sidaamu Dagoomu Qoqqowu Uurri Barri Geeshsha Sidaamu  Zoone Amaale Mini Songaaficha Assine Doorronni Amaale Mini Songo Misile

Sidaamu daga umose gashshate kaajjado sharro assitanni keeshshitinno. Sidaamu zoone amaale mini miilla umi yannara Maaja 4-9/1997 M.D assitino hasaawinni gumulte haja la`anno bissara sayissinohano ikkiro, gashshootu haxawarrenninna xagarronni dagate xa`mo higgukkinni keeshshitinno. 2010 M.D daga muricira sharro assatenni layinkimeeshsho Maaja 11/2010 M.D amaale mini miilla wo`ma huuronni gumult WDDQ amaale minira shiqishidhono.Ikkollana, kaajjado dagate sharro gedensaaanni dimokiraasaawe doogonni Boccaasa 10/2012 M.D gobbate seera agarinno garinni  dagate doorsha /referendeme assineenna 97.7% ikkitanno huuronni daga sidaamu qoqqowu gashshoote kalaqirate doodhasenni Ella 11/2012 M.D WDDQ amaale mini seeru garinni biillonye xa`mitinno dagara sayse uyno.

EFDR federeeshiinete amaale minino Sidaamu Dagoomu Qoqqowu Itophiyu 10ki qoqqowo ikke borreesame Ella 27/2012 M.D Mootimma faajjete safirino.

Konni kaiminni WDDQ amaale mini miilla ikkite Sidaamu daga riqibbe noore 56 miilla, albi Sidaamu zoone amaale mini 104 miillanna, Hawaasi quchumi amaale mini miilla giddo 30 miilla Qoqqowu bayiridi seeri quwa 47 aana worroonni garinni xaphooma 190 miillanni safame uurrino. 6ki doycho gobboomuunna qoqqowu doorsha assinni gedensaanni 5ki doycho doorshi amaalete mini miilla geegiisine wirro dooraminohuno, alba dooraminokkihuno haaro doorame  Sidaamu dagoomu qoqqowu amaale mini 190 miillanni uurrinoho.